長氣~陳醋雲耳(附食譜)

仲以為女兒入了大學，大個女啦！唔駛理佢啦！自己便可以很輕鬆！

點知佢住唔到 hall，上學放學時間又唔定，日日都唔同，而且又鬼死咁多活動要join….

搞到我要好長氣地~日日問住佢幾點放學？返唔返黎食飯？駛唔駛留飯？

真係問到口臭 =.=

陳醋雲耳易做、好味又留得，阿女幾時回來食都得喇 ^^

陳醋雲耳

雲耳一大把清洗濕軟，去蹄(頂頂硬身的部份) ，用大滾水焯雲耳2分鐘，即沖凍水或冰水(這動作要即做，雲耳至爽口的) ，澀乾水份，用抹手紙索乾，備用。

杞子適量，清洗後用大熱水浸開，浸軟之後隔水留用 (不用煮)

芝麻適量，白鑊炒香備用

預備一些葱粒。

調味汁:

鎮江甜醋 - 6至7湯匙

黑醋     - 2至3湯匙

生抽     - 2湯匙

砂糖     - 2.5-3湯匙

熱水     - 1湯匙

麻油     - 1茶匙

將1湯匙熱水與糖開溶，再加埋其他調味料拌勻，試味！可因應個人口味，略加減份量來調較酸甜度。

將汁料拌入雲耳及杞子，放入雪拒雪凍約幾小時至過夜，食時灑上芝麻及葱粒。

酸酸甜甜又爽口~ Yummy!

計劃~秘製豉汁

今天很忙啊！

忙著計劃去旅行~長線！短途！

忙著上網訂機票！

忙著報團！

忙著看人家旅遊網誌，揾酒店摷資料！

老公話：你忙忙忙…..都無一樣係忙揾錢？全部都係駛錢錢 >.<

女兒很愛吃蒸魚，由其是用這個醬汁蒸魚，可以抓一大碗白飯！

豉汁做法：

豆豉洗淨，一半豆豉舂碎，一半原粒。

蒜頭(我喜歡用獨子蒜，很香)切碎，薑切絲。

將所有材了加入碗內，加大半茶匙糖，一茶匙粟粉，一湯匙蠔油拌勻。

將魚洗正抹乾，碟底墊上幾條粗條薑絲，作用是托起魚身，讓蒸魚時蒸氣可穿過魚底，成條魚熟嘅程度均等。

將豉汁醬一大匙放入魚肚，其他舖上魚面。

大水滾後，放魚大火蒸，至於時間就視乎魚的大細及煮食爐的火力，其實蒸多幾次就掌握到時間。

蒸好後淋上生抽，倒少少熱滾油，灑上葱粒，便可上碟。

摸索~泰式柚子蝦沙律

新Blog 仍在摸索中，有啲暈@~@

這個泰式柚子沙律看似簡單，實質鬼死功夫，不過真係好好味，酸酸辣辣又juicy, 有興趣不妨試做！

食譜如下：
泰國金柚 - 1個,青芒果  - 1個(大), 蕃茄仔 - 10數粒, 其實也可加青瓜片,海蝦隨個人喜歡多少。
沙律汁 : 片糖用小小熱水開溶,柚子蜜又用小小水開溶,辣椒一隻去籽切碎，蒜蓉1粒切碎，泰式雞醬3大湯匙,魚露2-3湯匙,青檸汁1-2個搾汁。
撒面 : 蝦米白鑊炒香切碎,椰蓉白鑊小火炒香,蒜茸及乾葱茸用油炸香用抹手紙索乾油,還要預備芫荽碎及葱花！

做法 :柚子起用撕成碎塊，芒果起用切條，蕃茄仔切半，放在一起拌勻。
            海蝦去殼洗淨，用一煲滾水加入薑，葱頭葱尾，鹽及胡椒，香葉稍煲下，放蝦焯
           數分鐘沖凍水/冰水抹乾。
           將所有食材放在器皿稍雪一下，食時淋上沙律汁及灑上花生碎,蝦米碎,乾葱碎,椰  蓉及葱花碎。

P.S. 其實味道可因應個人口味調較，想辣D就加辣椒，想酸D就加檸檬汁，想濃味D就加多野泰式雞醬！