天大地大俄羅斯~Day 2 (Part B)

離開克里姆林宮之後，便去遊地鐵河^^

莫斯科地鐵站有好幾十佰個，每一個站各有特色，我地這些遊客當然不能參觀每一個站啦！

導遊帶我地去遊三個站，感受下當地人乘搭的主要交通工具！

嘩！中午時份都好繁忙啊！

雲石、大理石、雕刻、馬賽克、壁劃…….〝地下宮殿〞真的很美、很美！

俄國美女~

試坐地鐵~

在地鐵站發生了點小意外~

話說列車到站時，朋友叫我企在月台邊同架列車影相，點知有條〝粉腸〞失驚無神快速推我入列車裏，當時呢條PK友嘅舉動嚇死我呀，我當然死都唔入啦！

後來見到佢係咁笑，知佢玩我，我真係好嬲呀！列車未關門，我狂影佢囉(中間奸笑嗰個男人)！

之後個兩個地鐵站都唔敢企近月台邊，我驚俾人推落月台~

之後去食午餐~中菜！

天大地大俄羅斯~Day 2 (Part A)

第二天的行程很精彩啊！

先看看彼得大帝銅像 < 再到「世界文化遺產」之克里姆林宮及聖母升天大教堂 < 參觀莫斯科之〝地下宮殿〞靚靚地鐵站 <食午餐 < 紅場 < 聖巴素大教堂 <列寧像 <民族少女噴泉 <最後睇埋莫斯科馬戲團3小時表演 < 食晚餐 < 回酒店~

由於太多行程，所以搞到好夜好夜( 十點 )至食得晚餐呀！

彼得大帝銅像~

當天温度大至5-10度，唔凍好舒服，可惜陰天多雲，拍照不美

(其實我技術差 =.=")

早上已很多遊客排隊往克里姆林宮~

克里姆林宮已在1990年被聯合國教科文組織列入為「世界文化遺產」
也是俄羅斯最高行政地方，革命家列寧推翻沙皇後亦曾在此辦公。

內裡有政府機構、辦公大樓、對面就是總統府，總理會在這裏辦公及接代外賓。

總統府，生人勿近~

遊客不能接近，有型男看守的。

途經沙皇大鐘！

再入就見到好幾坐好有特色建築物~

其中最美就是聖母升天大教堂，我地可以入內參觀但不能拍照！

廣場上有演奏~

有好多遊人停留觀賞，好有氣氛~

也見到閱兵~

騎馬英姿，好型呀！

天大地大俄羅斯~Day1

 2013年10月4日出發往旅行，參加了美麗華旅行社之俄羅斯九天行程！

由於我地超早就報名(20/6/2013) ，所以得到了好多優惠，相比起其他的團友平成千幾至兩千蚊有多，如果可以的話，早些計劃及安排，除了可以有充裕時間，團費都會平好多喔！

九天團費+保險+機場稅燃油附加費+領隊小費 = HK$15,479.00                              

參加了其中兩個自費項目 = $90美金 (HK$700.00)

買手信加飲飲食食用了 = $100美金 (HK$780.00)

這個團可以用超值加累到爆黎形容，因為真係好多野睇，簡直用〝目不暇給〞黎形容！

除咗Day 1 及最後一天時間上鬆動點，其他時間都是不停地走走看看喔！

如果你喜歡看文化藝術、文化歷史、歷史性建築物、皇宮、博物館….. 你一定會很喜歡呢！

Day1                                                                                                                 

早上8點30分機場集合，乘坐俄羅斯航空10點55分機飛莫斯科！

全團共31人 (這人數唔太多人，坐車也鬆動點~唔錯、唔錯^^)

男領隊，帶團去了好多次俄羅斯，人太老練，看上去有點奸！

第一次坐俄航，朋友說俄航無電影睇……       

點會呀？長途機坐成差不多11小時……

上機後見到每個坐位背後有電視屏幕，好開心呀！我最鍾意坐飛機看電影(平時無時間睇影碟)，睇三幾套電影、睇下八卦雜誌、食幾餐再加埋瞓一陣，去下廁所~十幾小時航程好易過啫^^

點知航機起飛後，屏幕無反應，空姐無派耳機~原來真係無電影睇架！頂…….

連燈制都無獨立的，食完第一餐就熄晒燈，想睇下雜誌都唔得！K 型 > <

仲有就係起機後派一個餐(飛機餐味道都唔錯) ，跟住就係臨落機兩小時前至有另一餐食，中段個6、7個鐘係無野食(我見有人帶杯麵、月餅……………..我自己就帶咗件蛋糕)，連飲品都係自己問佢攞架！

日頭機又瞓唔著，唯有同人吹水啦！

到了俄羅斯首都莫斯科啦！當地時間下午5點幾 (俄羅斯比香港慢4小時)

落機後過關都好快，有個俄國美女做我地莫斯科導遊，佢說普通話的，我地本身普通話已經唔叻，而佢講嘅普通話就好似~獎門人節目裡嘅超級無敵估歌仔咁….

你話點會聽得明啦！

跟住就先去食晚餐(中菜) 再回酒店！

這間 KATENHA Hotel, 連續住兩晚，乾淨企理，房內雪櫃裡的飲品零食全部免費，食唔晒可帶走，第二天酒店曾再 refill 晒啲零食入去！好筍呀^^

早餐係西式自助餐，款式唔似東南亞酒店咁多款，但咖啡好靚，果汁好飲、麵包芝士、乳酪、火腿、腸仔、蘑菇樣樣都好好食！